Baina, hori nahikoa ez eta, 2014. urteko maiatzaren 25ean, estatu espainiarreko gorengo futbol mailara egin zuten jauzi. Kirol emaitza paregabea lortu zuen Eibarrek; zinez, zoriontzekoa. Erakutsi zuten, gogoz eta ilusioz jardunda, badela posible aurrekontu handiagoko taldeei irabazi eta horien aurretik sailkatzea.
Sailkatzea lortu bazuen ere, iragan udara luze egin zitzaien eibartarrei, LFPk hainbat eskakizun egin zien-eta; kapitala bikoiztea, esaterako. Beste aukerarik ez zegoenez, baldintza guztiak bete zituen Eibarrek.
Aurreko udaran ez bezala, pasa den igandeko partiduaren ostean, bazegoen aukerarik kazetari lotsabako batzuen jarreraren aurrean zer egin erabakitzeko: hautu egokia hartu zuen Gaizka Garitanok, Eibarreko entrenatzaileak.
Egoki jokatu zuen, ez dagoelako ulertzerik, 2015. urteko apirilaren 26an, munduko ligarik onena deritzenean, euskaldunok euskaraz egiteak nola ematen dien horrenbesteko nazka eta higuina hainbat espainiarri.
