Oraindik estreinaldi zehatzik ez duen Balenciaga telesailak jaso du lehen saria. Maialen Beloki Donostiako Nazioarteko Zinemaldiaren zuzendariordeak, Marta Nieto zinema zuzendariak eta Yon González aktore bergarrak osatutako epaimahaiak sei ataleko produkzio hau Gipuzkoan grabatu izana saritu nahi izan dute. Balenciaga telesaila Disney-ren jatorrizko produkzioa da, eta Moriartiren lanetan ohikoa den bezala Jon Garaño eta Jose Mari Goenagaz gain Aitori Arregi oñatiarra ere bada lan honen zuzendaria. Hiru zuzendariez gain, aipatzekoa da Irusoin ekoiztetxeak egindako lana.
Aipamen Berezia, 3.000 euroko diru-laguntza duena, José María Goenega zuzendariak eta Xabier Berzosa ekoizleak jaso dute. Biek pozik hartu dute aipamena, eta eskertzan, "tokiko talentuaren maila artistiko eta teknikoa" azpimarratu gura izan dute. Goenagak aipatu duenez, azken urteetako produktuak ikustea besterik ez dago euskal produkzioen maila ikusteko.
Erronka handia
Disneyren produkzio hau ez da ahuntzaren gauerdiko eztula izan. Sei atalak sortzeko 90 dekoratu eraiki behar izan dituzte, produkzioak 100 pertsona baino gehiago izan ditu eta hamazortzi astetako filmazioan 4.000 figurante izan dira.
