Behin eta berriz kantua entzun ondoren, barruan onartu nahi ez nuenaren sentimendua loratu da: gauzak, guk nahi ala ez, aldatu egiten direla. Askotan, aldatu nahi ez denari gogor heltzen diogu, energia eta indar guztiak bertan utziz.
Hori jakinda ere, aldatu(ko) den beldurra sentitzea zilegi da, gure baitan betikotasunaren ideia oso erroturik dugulako. Ken7k ere ezer ez dela betiko kantatuz askotan helarazi izan digu gauzak iheskorrak diren ideia.
Aldatzen da begirada, azalekoa, ikuskera, nahiak, ametsak, plazan duzun lekua, harremanak, natura, ingurua, ekarpena egiteko modua, zure buruarekiko eta gainontzekoekiko maitasuna... Eta naturalki aldatzeak edo kontzienteki aldatu nahi izateak garatzera garamatza, gure gorputz mugimenduari begiratuz, gutaz gehiago jakitera.
Bart aldatu zenak bihar aldatzen segi dezala, beldur eta desioa sentituz gorputz honetan ni aldatu naizen bezala.
