Ez dizuet ezer berririk kontatuko; izan ere, euskararen biziberritzea impasse egoera baten dago: ezagutzak gora egin du, baina erabilerak ez.
Bada, horrekin lotuta, bitxikeria bat kontatuko dizuet, nire ustez, poztekoa dena eta Debagoieneko biztanleoi zuzen-zuzenean dagokiguna.
Aspaldikoa da debagoiendarron artean erosketak egitera edo bestelako mediku eta espezialistak bisitatzera Gasteizera joateko ohitura.
Ikustekoa izaten da Gipuzkoan jaieguna denean Boulevard zentro komertzialak jasaten duen inbasioa, eta egun horietan fenomeno xelebre bat gertatzen da: Boulevarden entzuten da Gasteizko auzo askotan baino euskara gehiago.
Nik neuk txantxetan esan ohi dut Boulevard euskararen arnasgune instrumentala bihurtzen dela.
Baina Boulevard ez da irla bat eta Gasteizen euskara momentu politean dago.
Hortaz, hurrengoan hirigunera bisitan joatea proposatzen dizuet eta eraman zuekin euskara mingainean, harrituko zarete.
----------
Irati Itziar
Oñati
