... jakin badakidan arren ilargia ez dela puska horretaz bakarrik osatua, ikusgaitz zaidan besteak ere osatzen duela.
Munduarekin ere antzeko zerbait gertatzen dela uste dut. Erakusten diguten, eta ondorioz ikusten dugun, zatia bakarrik begiztatu dezakegu, baina gai al gara erakusten ez diguten hori badela susmatzeko ere? Telebistan, egunkarietan, irratian, Interneten... aurkitzen ditugun egoerek soilik osatzen al dute mundua? Gainontzekoa ez al da existitzen? Eta existitzen bada, ezin al da aditzera eman? Ezkutuan jarraitu behar al du?
Ilargiari begira jartzen naizenean, hasierako momentuan ikusten dudanaz gozatzen dut, baina denbora bat gora begira pasa ondoren, eta kontuan harturik ilargi betea dagoenean ere erdia besterik ikusten ez dugula, ezkutatzen duenari interesgarriagoa deritzot.
Agerikoa behar lukeenari kanporatzen ez uzteak ez du izenik. Guztiok esan nahi ditugunak esateko ordua iritsi dela uste dut, munduari gure ilargi betea erakusteko unea iritsi da. Ilargiak ez du beti alde bera erakusten, eta munduari berari ere ez lioke batere kalterik egingo behingoz beste alderdiren bat erakutsiko balu eta orain arte ezkutaturikoa argitara aterako balu.
