Beste behin. Ordezko izenburua ere badu erremate honek: DANA ikasteke. Biblikoa izaten ari da azken garai honetako hondamendia. Apokaliptikoa.
Inpunitate osoz, gure begi aurrean, herri palestinarraren genozidioa Moisesen agindupean eraikitako tronpeta sionisten soinupean gertatzen ari da. Apokalipsiaren lehen hiru tronpeten antza duten irudi ugari ikusi ditugu azken urtean: zerutik sua, suntsitutako herri eta landak, itsasoa eta ibai eta iturrietako ura egarri eta gose direnei ukatua...
Laugarren tronpetarekin, iluntasuna. Mediterraneoko beste ertzean gertatutako DANA ondoren hedatu zena. Mila urtean behin ere gertatu behar ez zuen ekaitzaren suntsipena. Klima larrialdiari esker, ez da izango ikusiko dugun azkena.
Ai, ai, ai bezala ezagutzen dira Apokalipsiaren 5, 6, eta 7. tronpetak. Kaosa hedatzen duen putzua irekiko du mass media-ren zerutik iritsitako izar ilehoriak. Apokalipsiaren zaldunak askatuko dituen trumpetak dira nire belarrian.
