Julia Hawkins estatubatuarrak ere 102 ditu. Munduko korrikalari helduena ei da. Iaz, marka berria lortu zuen, Louisianako adinekoen lasterketan: 100 metro, 40 segundo baino gutxiagoan. Eta entrenatzen jarraitzen du, etxeko lorategian. 100 urterekin hasi zen antxintxiketan. "Barregarria da: sekula ez dugu geure burua zahar ikusten!", zioen duela gutxi.
100 urteko emakume bat elkarrizketatu dut berriki. Felisa Etxabe azkoitiarra. Bizia, umoretsua. Kontalari aparta. Egunero basotxo bat ardo edaten du, "Mendaroko medikuaren aginduz". Esan zion 80tik aurrera ez duela kalterik egiten. Flora ahizpa bikiak eta biek 101 urte beteko dituzte laster. Errege egunean jaio ziren, "bata amaren zapatan eta bestea aitaren botan!".
Gazte sentitzen diren zaharrak. 100 urtera iristea ez, baina zahar sentitzen diren gazteak ez izatea gure esku dago.
