Sare sozialekin gehiegizko dependentzia dute, antsietatea sortzeraino. Zenbaiti baita depresioa ere. Izan ere, sare sozialetako "gertaera inportanteak" galtzeko beldur dira: Fear Of Missing Out. Horregatik, sare sozialei eguneroko bizitzari baino jaramon gehiago egiten diete. Sare sozialetan gertatzen dena da euren errealitatea. Ba ez… ez daukat sindromea!
Besteen bizitzak haienak baino interesgarriagoak direla, sentsazio hori omen dute FOMOek. Hori eguneroko bizitzan ere gerta daiteke: ingurukoak gu baino zoriontsuagoak direla iruditzea. Baina sare digital erraldoian are gehiago. Eta euren lekua bilatu ezinik dabiltzala dirudi. Nahiko luketen pertsonaia arrakastatsua eraiki ezinik.
Cogito ergo sum. Aspaldi esan zuen Descartesek. "Pentsatzen dut; beraz, banaiz". Orain, berriz, Interneten ez dagoena ez dela existitzen pentsatzen dugu. Lehen Homo Sapiens ginen. Orain, Fomo Sapiens.
