Mortara hori 26 urtean Oñatin bizi izan zen apaiz bat zen, eta Spielberg berari buruzko pelikula bat egiten ari da. Zein eta Spielberg!
Nolatan interesatzen zaio ba Spielbergi apaiz xume bat? Euskarak erakarrita etorri omen zen Italiatik Oñatira. Euskara ikasi zuen, eta sermoiak ere eman zituen euskaraz (oñatieraz, seguruenez) Euskal Herriko hainbat lekutan. Hori interesgarria da, bai.
Baina Spielbergi bost axola horrek. Pelikulan ez da Oñati agertuko. Eta gutxiago Mortara euskaraz hitz egiten. Haren haurtzaroa interesatzen zaio: Vatikanoak bahitutako ume judu bat izan zen Edgardo. Sei urterekin etxera joan zitzaizkion bila, hura fede kristauan hazteko. Familia mutikoa berreskuratzen saiatu zen urte luzez. Aske utzi zutenerako, baina, majo kristaututa zegoen. Eta horixe da Spielbergek kontatuko duena.
Aita Mortara izeneko kalea dago Oñatin. Unibertsitate atzeko kaletxoa da. Ocho apellidos vascos filmarekin gertatu zena ikusita… Parke Jurasikoa bezain ezaguna egingo ote da aurki?
