Bai, horixe bera, Sandra Bullockena. Hamaika aldiz bota dute telebistan. Badaramatzat urte batzuk obsesio horrekin: kontrolatua izatearen beldurra. Atera kontuak, pelikula 1995ekoa da. Eta zinean ikusi nuen.
Horregatik ez nuen mobilik nahi. Inola ere ez. Baina badaukat mobila. Aspalditik, gainera. Lokalizagarri nago. Nagoen tokian nagoela ere. Eta e-maila ere badaukat. Aparteko burujanik gabe egin nuen e-maila. Baina nire mezu eta argazkiak CIAren esku egongo dira. Zureekin batera. Eta orain… wasapa. Kontrol gehiago ez, faborez. Baina… hor ere eroriko naiz.
Etorkizunean, denoi azal azpian txipa jarriko digute. Hori esan zidan behin igarle batek. Eta baliteke arrazoia izatea. Baina okerrena da guk geuk jarriko ditugula. Motorolakoek asmatutakoak, adibidez; Interneten eta mobiletan pasahitzak erabili ordez, hauxe proposatu dute: tatuaje eta pilula elektronikoak erabiltzea. Bi aukera: txipa azalean ala txipa urdailean.
Laster txipa aldatzera joango gara. Dendara.
