Bi orriko erreportajeak egunkarietan. Zein gogorra den lanera bueltatzea, estresa, depresioa. Lanik ez izatea traumatikoagoa izango da ba!
Oso modan dagoen beste hitz bat: egokitzapena. Ume txikiek egokitzapen aldia egin behar dute haurtzaindegietan. Lehen egunetan ordu erdi egiten dute bertan, hurrengo egunetan ordubete, gero bi ordu... eta horrela, umeak erabat egokitu arte. Izan ere, bestela traumatizatu egingo dira, gaixoak. Jakin nahiko nuke nork eta zeren arabera erabaki duen hori. Gure garaian ez zen halako txorakeriarik, eta ez dugu trastorno larririk, ala?
Gurasoen lantokietan, ordea, gehienetan ez da izaten ordutegia egokitzeko aukerarik. Malgutasuna falta da. Eta haurtzaindegira bueltaka ibil daitezkeen aitona-amonarik ez badute, ez daukate beste erremediorik oporretatik egun batzuk hartzea baino. Bi aste igual. Hori bai dela sindromea sortzeko modukoa: Inuxente sindromea.
Oporretatik bueltan guk ere egingo genuke aste batean bi ordu lan, hurrengoan lau, gero sei… egokitzen joateko. Ikerketa egin dezatela, igual hori izango da-eta gure traumen iturria.
