Asmo onak alde batera utziko ditugu, bizitza honek daraman abiada bizian gehiegi pentsatzeko astirik ere ez baitugu eta. Ez diot hobekuntza handirik eskatu nahi urte berriari; aurrekoa berdintzeko gai bada, konforme. Eskerrak eman nahi dizkizuet nire 2017a urte zoriontsu bilakatu zenuten guztioi, lagun zein ezagunei, arrazoi eta arlo ezberdinak medio nire bizitzako parte bilakatu zaretenoi zein kalean gurutzatzerakoan irribarre bat eskaintzen didazuenoi. 2018an nire alboan beharko zaituztet berriz.
Eskerrak eman ere urte hauetan guztietan zutabe honetan jarraitu nauzuen irakurle guztioi, plazer bat izan da urteotan zeuen barnera iritsi ahal izateko ahalegina egitea. Beste norbaiti aukera hori uzteko unea iritsi da. 2018 zoriontsu bat opa dizuet guztioi, zeuen zoriontasuna neurea ere izango baita. Musu handi bat, bihotzez, eta mila esker.
