Ama Lurrak eskaerari erantzunez bere alabetako bat sortu zuen, eta Ilargi jarri zion izena. Gizakiak eskertu zion Ama Lurrari, baina argitasun hori nahikoa ez zela ikusi zuten. Berriz ere Ama Lurrari eskatu zioten, argi gehiago nahi zutela iluntasuna gainditu eta izpiritu txarrak aldentzeko. Orduan, Ama Lurrak bere bigarren alaba sortu zuen, Eguzki amandrea. Egunez Eguzkiaren argiak babesten zituela, baina gauez Ilargiaren argia ez zela nahikoa eta Ama Lurrari babesa eskatu zioten gauerako, eta Ama Lurrak eguzki lorea sortu zuen.
Eta Ama Lurrak etxe atarietan eguzki lorea jartzeko esan zien gaueko izaki txar eta beldurgarriak uxatzeko. Neolito garaitik, nekazaritzaren sorrerarekin, euskaldunok – eguzkia, euria, ekaitza, hodeiak, trumoiak– jainkotu eta gurtu izan ditugu. Kultur ospakizun eta eskaintzak egiten omen zituzten beraien mesedeak jaso ahal izateko. Aurtengoa ikusi eta gero, Eguzki Amandreari eskaintzak egin behar dizkiogu. Hodeiri, alde egiteko eskatu, eta Ama Lurrari, babesa, hainbeste eurik kalte ez egiteko, eta eguzkia neurrian etor dadila uzta eta gure osasuna babesteko. Has gaitezen, bada, akelarreak eta eskaintzak egiten gure arbasoek egin ohi zuten eran!
