Migrazio-mugimendu horiek eragiten dituzten kausez harago, bizitza hobea bilatzea da helburua. Ez al da hori denok nahi duguna guretzat eta geure senide eta ingurukoentzat? Ez al da zentzuzkoa?
Zergatik ez dugu ezer egiten eta ez dago gizartearen erantzunik mugetan heriotzak izaten direnean?
Ez da Melillan gertatzen den kontu bat, ez da Mexikok Ameriketako Estatu Batuekin duen mugan gertatzen den zerbait, Bidasoaren ibilguan ere badugu. Ez dezagun ahaztu aurten hamar pertsona baino gehiago hil direla Frantziara igaro nahian.
Hemen, mundu honetan, ez dago inor soberan. Guztiok behar duguna da giza eskubideak errespetatzea. Unibertsalak dira. Guztiok behar duguna da bestearengan aitortzea, migratzailea izan ala ez, badituela. Beldurrik gabe, aurreiritzirik gabe, harrera eginez.
