Gure hizkuntzaren egoera normalizatzeko bidean urrats garrantzitsua da, ezbairik gabe, eta AEDk gonbita luzatzen dizu, webgune edota posta elektroniko baten jabe bazara, haien abizenak alda ditzazun. Dagoeneko 2.000tik gora dira halaxe egin dutenak eta gure elkartea ere bidean da. Zu ez zara atzean geratuko, ezta?
Izan ere, edonork –izan norbanako, izan entitate, izan hemengo, izan nonahiko– egin dezake eskaera eta nahikoa da hiru pauso erraz eta azkar jarraitzea horretarako: www.domeinuak.eus webgunean sartu, webguneari jarri nahi diogun domeinua eskuragarri dagoen begiratu eta, horrela bada, bertan ageri den erregistradoreen zerrendatik bat aukeratu, haren bitartez erosketa-prozesua gauzatzeko.
Diru aldetik ez zaizu garesti irtengo –30 eta 100 euro bitartean, kontratatu nahi ditugun zerbitzuen arabera– eta asko daukazu irabazteko nortasunean eta erreferentzialtasun mailan. Zergatik? Ba… EUS laburdurak euskararen eta euskal kulturaren komunitateko kide sentiarazten gaituelako; kohesiorako gune delako; muga geografikorik gabeko sarean gu geu izateko aukera eta tokia onartzen dizkigulako; nazioartean ikusgarri egiten gaituelako; euskara beste hizkuntzen pare jartzen duelako… Bada dEUS, ezta?
----------
Itxaro Artola Lizarralde
(AED elkartearen izenean)
Arrasate
