... eta etxe politaren ondoan lore politak zeuzkan lorategian eta auto polita estalpe batean. Etxean emaztea zeukan. Ironiaz beteriko hitz horiekin abiatzen da Urdaburutarrak.
Familia osoak eta elkarrekin irakurtzea merezia duen album ilustratu ederra. Ederra, bai itxuraz, bai mamiz. Haur literaturan sailkatua egon arren, etxeko guztiei emango dielako zer pentsatua eta zer ikasia. Errealismo gordinez, hitz zorrotz eta irudi indartsuz, eredu patriarkalaren araberako genero rolen banaketa gogor kritikatzen du, emakume askoren egoera familiarra islatuz. Edo gehienen esan beharko genuke oraindik ere? Ze, ea! Zenbat etxetan ez darama amak beregain familiako arduren zama handiena? Zenbat etxetan jokatzen dugu gurasook koherentziaz seme-alabei irakatsi nahi omen dizkiegun justizia eta berdintasun-baloreekin eta benetan, egunerokotasunean, ematen diegun ereduarekin?
Beharrezkoa ote, gauzak aldatzen hasteko, Urdaburutarren istorioan bezala, egun batean, kokoteraino dagoen emazteak hanka egin eta UrdAburu jaun-semeen bizimodu idilikoa UrdEburutarren amesgaizto bilakatzea?
