Tratulari guztiek ez dute zori bera izaten, eta batzuek ez dute lortzen euren merkantzia gehiengoaren edukiontzian sartzerik. Kasu horietan, bozgorailu garrantzitsu bat izan ohi dute euren aldarrikapenen argazki bat lortzeko. Oposizioko alderdi nagusiak, adibidez, 2.088 emendakin aurkeztu omen ditu, ez gehiago ez gutxiago, salbuespenak salbuespen, guztiak zakarrontziak irensteko patu tristearekin. Horien artean, batek eskatzen du funts publikorik ez dadila bideratu euren kideen artean terrorismoagatik zigortuak dituzten alderdietara. Seguru asko, emendakina baztertua izango da, baina PPk tematuta dabilen argazkia lortuko du.
Aurrekoa pentsaera molde baten adierazgarri garbia bada, bitxien kutxan sartu beharko dugu, Hego Euskal Herriko alderdi bozkatuenak, betiere, hedabideetan irakurri dugunez, futbol talde kuttunenaren zuzendaritzako kide edo kidegaiek orain arte aurkeztu behar zituzten berme ekonomikoak aurrerantzean aurkeztu beharrik ez dezaten izan proposatzen duen emendakina.
Interes orokorreko gaia behar du izan, nahiz eta batzuek horrela ikusi ez. Antza, Kirolaren Legea zaharkituta geratu denez, eta laster tramite parlamentarioan berria eztabaidatuko denez, artikulu hau azoka honetan trukatzea egoki dela iritzi diote emendakinaren aurkezleek. Atzeko atetik, baina botoen indarrez. Betiere, legearen barruan, noski.
Izango dira, bada, gai hau baino garrantzitsuagoak.
