Elizan aldi garrantzitsua dugu Pazko aurreko berrogei egun hauek. Elizak, garizuman, kristau garenoi, bereziki, eta, oro har, herri osoari, jatortasunaren eta zintzotasunaren aldeko deia zabaltzen digu. Badakigu dei mota hauek hitzez baino adibideekin eginez gero hobeak direla; hala ere, beharrezkoak ditugu. Gure artean balioak berez sortzen zaizkigula sinisturik baikaude, ilustrazioaren ideia oker bati jarraituz. Honetan ere, errealitateak kontra egiten du.
Horregatik, egiaren, zuzentasunaren eta ontasunaren aldeko aldarrikapena ez da alferrik izango. Zuzenago izango den gizartea nahi badugu, zuzenagoak izango diren pertsonak sortu beharko ditugu. Lan horretan gabiltza, baina ez dugu lortzen. Jatorrizko bekaturen errua izango ote da?
