Beti marmarra berdinean gabiltza: ezertarako ez dutela balio, zaharkitutako eta partiduen barnean oztopo bihurtzen diren politikako gizon emakumeentzako kabi gozoa ordaintzeko aukera besterik ez dela, urrutiegi gelditzen zaigula, gu bezalako herri txikien kontra antolatuta daudela...
Ni nago, Europako Batasunaren indarra guregan geroago eta handiagoa dela. Bi adibide esanguratsu jarriko ditut: Parot doktrina desegiten duen agindua Europako tribunaletik etorri da. Honen ondorio zoriontsuak gure herrietan ezagutu ditugu. Bigarrena, alokairuzko etxeetan bizi diren maizterrak botatzeko Espainian indarrean zegoen legea ere, bertan behera utzi dute.
Gai potoloak dira bi horiek eta adibide gehiago badaude. Europako agintea jogurten iraungitze epealdiaz baino haratago doa.
Jakina da, oraindik orain, historia neurtzen duen lur eremu honek jarrera giza gabeak non-nahi aurkeztu dituela, baina mundu mailan gizatasunean eman diren aurrerapausoak ere, bere sorrera hemen izan dutela ere ukatzerik ez dago.
Europako Batasunean parte hartzeak kontinente mailan izan diren giza eskubideen defendatzaile sutsuenekin bat egiteko aukera ematen digu.
