Zergatik egingo dugu greba? Ez gaudelako prest bizitzaren prekarizazioa eta pobretzea onartzeko, eta etxebizitza langileok pobretzeko arrazoi nagusietako bat delako, soldata kaskarrekin batera. Egoera iraultzeko, sakoneko aldaketak behar ditugu, eta horiek aldarrikatuko ditugu. Euskal Herrian badira baldintza objektiboak eta subjektiboak egiturazko aldaketak eragiteko.
Nori zuzenduko diogu greba? Batetik, EAJri eta UPNri exijituko diegu Madrilen zein Euskal Herrian langileen prekarizazioan sakontzen duten neurriak ezartzeari uzteko; eta, bestetik, Eusko Jaurlaritzari eta Nafarroako Gobernuari eskatuko diegu langileen aldeko politikak ezartzeko.
Bestalde, lan-eremuan patronalak langileon prekarizazioa betikotzen jarraitzen du, eta uko egiten dio hemengo errealitatera egokitutako gutxieneko soldata propioa ezartzeari, eta, etxebizitzaren eremuan, higiezinen patronalak langileon bizitzen kontura aberasten jarraitzen du. Haiei ere egingo diegu greba.
Etxebizitzari dagokionez, errentismoa eta negozioa amaitzeko egiturazko neurriak exijituko ditugu: alokairu-kontratu mugagabeak; alokairuen prezioak jaitsi eta merkatuan esku hartu; etxegabetzeak amaitu; putre funtsak desjabetu eta Euskal Herritik kanporatu; espekulazioa debekatu; eta parke publikoa defendatu eta handitu.
Horregatik guztiagatik, azaroaren 11n kalera aterako gara!
----------
Ana Sebal Agirregabiria
LAB sindikatua
Bergara