Artia mendiak haize-errotaz josirik daude eta zentral eolikoak ezarri nahi dira Antzuolan, Bergaran, Gatzagan eta Aramaion. Euskal Herriko beste lurralde batzuetan ere gertatzen da, baina Araban bereziki pairatzen ari gara makroproiektuen eragina; sustatzaileei alfonbra gorria jartzen zaie, eta herritarrei informazioa ezkutatu. Ez dago plangintzarik eta landa lurra eskaintzen zaie espekulatzaileei. Lurraren defentsa dugu helburu, eta beste lurraldeetako borrokekin bat egiten dugu.
Mota guztietako industria-proiektu handiak pilatzen ari dira Araban: Abiadura Handiko Trena, makro-zentral eolikoak eta fotovoltaikoak, goi-tentsioko lerroak, makro-datu zentroak, biometanizazio makro-plantak, nekazaritzako makro-ustiategiak... Guztiek ezaugarri berberak dituzte: eskala handikoak dira, eta haien eraikuntzarako ezinbestekoa da gure landa-eremuak eta ingurune naturalak suntsitzea.
Araba espekulazio-taula gisa erabiltzen duen lurralde-industrializazioaren ereduan sakontzen jarraitzen da. Espoliazio horrek ez du paisaia bakarrik mintzen; ondasun naturalak pribatizatzen ditu, lur eta mendi komunalak desjabetzen dizkigu, landa-eremuko bizi-proiektuak hausten ditu eta gure komunitateak abandonura bultzatzen ditu.
Maiatzaren 23an mobilizazio jendetsua egingo dugu Gasteizen, gure aldarrikapenak entzun daitezen. Gure konpromisoa bizitzarekin, gertuko energia- eta elikagai-ekoizpen jasangarriarekin, eta egungo eta etorkizuneko belaunaldiak errespetatuko dituen lurralde-antolamenduarekin da. Bulegoetatik agintzen dutenek ulertu behar dute inposatutako proiektu bakoitzak aurrez aurre aurkituko gaituela; guztiona dena babesteko erantzukizuna gure gain hartuko dugu.
----------
Jon Ugarte Ugarte
Aramaixo Bizirik
Aramaio