Lehenik eta behin, bidezkoa da jendaurrean aitortzea bere taldeak urte hauetan guztietan egindako lan bikaina: bokazio handiko eta kalitate handiko profesionalak, gure familietan arrasto sakona utzi dutenak. Benetan, mila esker, bihotzez!
Orain, etapa berri bat hasiko da. Aretxabaletako haur eskola doako zerbitzu publikoa izango da aurrerantzean, eskubideak eta aukerak zabaltzearen aldeko apustua egiten duen gizarte eredua indartuz. Ez da urrats makala: haur guztiei bermatzen die ia jaiotzatik hezkuntzarako sarbidea berdintasunez egitea, eta hori, gure ustez, babestu beharreko funtsezko ondasuna da. Eskerrik asko, halaber, agintari guztiei, erakunde eta sentsibilitate desberdinei, hori posible egin baitute.
Orain arte, Aretxabaletan kalitatezko hezkuntza ibilbide publikoa, euskalduna eta doakoa izan dugu 2 urtetik 16 urtera. Orain, 0tik 16ra luzatzen da. Zorionekoak gara eta izugarrizko poza ematen digu.
Nostalgia apur batekin agurtzen dugu lehengo Pausoka; baina, konbentzimenduz eta itxaropenez, ongietorria egiten diogu berriari. Zorte on guztioi eta gozatu bideaz!
----------
Ane Txapartegi, Naiara Urrutia eta Maddi Bengoetxea
Pausokako familia batzuen izenean
Aretxabaleta