Funtsean ados omen daude aldarrikapenekin, baina uko egiten diote eztabaidari. Kuriosoa benetan!
Beste arrazoi batzuen artean, hemen egoera larrian daudenentzat RGIa daukagula esaten digute, baina orain dela hilabete janarien bankuko boluntarioek ukatu egin digute hori: hemen RGIa egon arren, egoera larrian edo zaurgarrian dauden familia askorik ez dagoela, alegia.
Bestalde, emakume pentsiodunen bosgarren batzarrean, etxeetan ezartzen diren biolentzia matxisten kasuen artean dependentzia ekonomikoa biolentzia horren faktore garrantzitsu moduan identifikatu digute. Aldi berean, indarkeria matxisten kontra propaganda instituzionalez josita agertu dira egun hauetan komunikabideak, praktika horren kontra; baina dependentzia ekonomiko horretara behartuta dauden pentsiodun emakume mordoari Herri Ekimen Legegileak emango liekeen erabaki-ahalmenari ateak ixten dizkiote.
Hainbat komunikabide, Vocento –El correo, DV– buru dela, belaunaldi arteko talka sortu nahian dabiltza, pentsiodunak pribilegiatu hutsak garela, langile gazteek gure pentsioa baino gutxiago kobratzen dutelako, errua soldata horiek ezartzen dituen patronalari bota beharrean erantzukizun hori gurea izango balitz bezala.
Bada, gauzak horrela, emakume zein gizon, pentsiodun zein langile, bertako zein etorkin; betiere, klase borrokaren bidetik, abenduaren 13an, 12:00etan, San Martin plazatik abiatuta egingo den manifestazioan parte hartzera deitzen zaituztegu.
----------
Jose Luis Loidi Larrañaga
Bergarako pentsiodunen izenean
Bergara