Arrasatearra naiz, mendia maite dut eta Udalaitz da nire mendi kuttunena.
Galdetu diguzue herritarroi ea ados gauden gurutzea ezabatzearekin?
Tiraniaren legea: Ez dut gogoko; beraz, ezabatu egingo dut nahi dudalako.
Badaukat katuak gorrotatzen dituen lagun bat; aldiz, ez ditu katuak pozoitzen.
Badaukat kolore laranja atsegin ez duen lagun bat; aldiz, ez ditu gure etxeetako teilak puskatzen.
Badaukat makatzak kalte egiten dioten lagun bat; aldiz, ez du fruituzalea mesprezatzen.
Zuek "Gurutze Santua" deitzen diozuen hori niretzako burdin zati bat besterik ez da; seguruenik, beste batzuendako, bista ederra irudikatzen duen gunea; beste batzuendako, tontorraren lehenengo zatia edota atseden hartzea irudikatzen duen hornidura-gunea.
Arazoa sinbologia bada, goazen elizak eta kanposantua erretzera!
Bai, eta izan zitekeen harri edo ipurtargi. Adarra edo kolorez beteriko ortzadarra. Nork daki. Beharbada, Anbotoko Mari da egia absolutua ezagutzen duen bakarra.
Ez diezaiogun errespetua galdu.
----------
Xabier Elgezabal Uribarren
Arrasate
