Euskalduna, abertzalea, langilea, zintzoa, bakezalea… bakearen gizona. Beti irribarre batekin, beti lanerako prest, elkarrizketarako prest, elkargunea bilatzeko prest.
Arrasaten demokrazia garaiko lehen alkatea izan zinen. Egun hauetan irakurri dut garai batean egindako elkarrizketan, politika garaiko urte gogorrenak hemen bizi izan zenituela, eta ez nau harritzen; gaur egun ere, 2024. urtean ere, Arrasate plaza zaila da! Baina gogor ekin zenion Arrasate eraikitzera, beste batzuk apurtzen ahalegintzen ziren bitartean. Beti Arrasate Aurrera eramateko lanean, beste batzuk atzean uzteko lanean egon ziren bitartean. Arrasaterekin egin zenuen bezala, 1985ean Euskadirekin egin zenuen.
14 urte luzez Euskadi Aurrera eramateko eta egunetik egunera hobeagoa izateko lanean egon zinen, ETA apurtzen eta atzean uzteko lanean egon zen bitartean. ETAk Euskadi eta euskaldunok atzean utzi nahi gintuen eta zuk ez, zuk berriz Aurrera! Euskalduna, abertzalea, Euskadi librea… baina lanean eta Aurrera, ez hiltzen eta sufrimendua eragiten. Zenbat egun ilun bizi izan ditugun euskaldunok ETArengatik. Zenbat malko, zenbat min, zenbat arrazoi gabeko heriotza.
Bai, noski! Euskaldunok Espainagatik asko sufritu dugu eta, zoritxarrez, sufritzen jarraitzen dugu, baina lanean egon gara eta gaude Euskadi aske eta sendo bat eraikitzen. Orain ere horrela jarraitzen dugu. Bai, noski, garaiak aldatu egin dira, eta zu egon zinen aldaketa hauen oinarrietan. Baina ez dugu amnesiarik sufritzen eta ez dugu sufrituko eta gure oroitzapenean ETAk eragindakoak oroitzen jarraituko dugu. Zoritxarrez, denok dugu gertu ETAk hildako senide, lagun edo gertukoren bat. Eta, noski, denok dugu gertu senide, lagun edo gertukoren bat Espainiak eragindako kalteengatik hil edo sufritu duena, baina horrek guri, jeltzaleoi, inoiz ez digu aitzakia bezala balio guk ere mina eta sufrimendua eragiteko; horrek guri, jeltzaleoi, lanean jarraitzeko indarra eman digu Euskadirengatik eta euskaldunondako.
Orain ere asko gara Indar Berriaz beteta eta egunero gogotsu eta kementsu, zure lagia jarraituz, lehendakari, lanean jarraitzeko indarrez gaudenak. Guk ere, zuk bezala, Pasion Por Euskadi dugulako. Zuk 1999an utzitako lehendakaritza, zure ondorengoen lanari jarraituz hemen gaudelako; 2024ko apirilaren 21tik aurrera Iñigo Urkulluk utziko duen lehendakaritzan lanean jarraitzeko indartsu gaude.
Eskerrik asko, Jose Antonio Ardanza! Eskerrik asko, lehendakari! Eskerrik asko emandakoagatik eta erakutsi diguzun Pasion Por Euskadirengatik! Lanean jarraitzeko gaude eta izango gara Indar Berriarekin!
-----------
Agurne Juldain Alcalde
Arrasateko EAJ-PNVko lehendakaria
Arrasate
