Hasita gaude Euskaltzaleen Eguna prestatzen!

Orain bi urte moduan Euskararen Soka egingo dugu herritarren parte hartzearekin eta Arrasateko gaiteroek lagunduta. Irailaren 15erako ari gara Euskaltzaleen Eguna prestatzen. Gorde zuen agendetan! Bazkaltzeko brasan erretako hegaluzea gertatuko digute Kalitatea-ko ordezkariek, eta erromeria, aurten, Drindots taldeak egingo du.

Poliki-poliki badoa forma hartzen irailaren 15ean egitekoa dugun Euskaltzaleen Egunak. Orain bi urte egin genuen lehenengo aldiz, eta herritar ugarik hartu zuen parte ekimenean.

Oraingo honetan ere ez dira faltako neska-mutikoendako puzgarriak, Arrasateko gaiteroak, Goibeko Euskaltzaleen Topaguneko txosna eta jai giroa. Euskararen Soka izango da eguneko ekitaldi nagusia. Hala, nahiko genuke euskararen uztaia eskutik eskura iristea plazara. Euskaraldiaren urtea da honakoa eta Euskaltzaleen Egunak bat egingo du Euskaraldiarekin. Iaz eskolatik ekarri zen euskararen ardura plazaraino eta aurten Euskaraldia izango dugu gaitzat. Ahobizi eta belarriprestak gura ditugu plazaren erdigunean eta horixe izango da erronka.

Bertan irakurriko dugu eskutik eskura plazara iritsi ostean uztaiak barruan dakarren mezua. Euskaraldiako materiala erosteko aukera izango da Euskaltzaleen Egunean, eta izen-ematearen inguruko informazioa ere banatuko dugu.

Gorde zuen agendetan eguna. Irailaren 15ean denok elkartuko gara plazan. Ahobizi, Belarriprest eta herritar guzti-guztiak daude gonbidatuta.
Irailaren hasieran jarriko dira salgai bazkarirako txartelak.

 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.