Harreman Dendan, Oxfam Intermon-eko –Espainiako Oxfam GKE– Bidezko Merkataritzako produktuak dauzkagu, eta gure jarrera argi laga nahi dugu; zero tolerantzia horrelako gertaerei. Oso zorrotz kritikatzen eta salatzen ditugu bai errudunak –abusuen egileak–, baina baita ardura zutenak ere –beste alde batera begiratu zuten zuzendariak–.
Hau esanda, gustatuko litzaidake aipatzea zurrunbilo honekin sektore guztia zaku berean sartu nahi dutela batzuek. Eta noski, hori ere gogor kritikatzen dugu, ezjakintasunean oinarritutako iritziak eta akusazioak entzun baitira azkenaldi honetan.
Oxfam GKEk hiru lan-ildo ditu: Laguntza Humanitarioa –goseteak, lurrikarak, eta abar daudenean–, Intzidentzia Politikoa –txosten objektiboen bitartez ezkutatutako errealitateak azalaraztea helburu– eta Bidezko Merkataritza –ekoizleak duintasunez tratatzea–. Orain albiste penagarri diren horiek Laguntza Humanitarioan gertatu ziren; beraz, guk, gure aldetik, Fairtrade Mugimendua errealitate bihurtzen dugunok, ez daukagu, inondik inora, lotsarik sentitu behar.
----------
Gorka Martinez
Harreman Denda Bidezko Merkataritzako koordinatzailea
Arrasate