Izan ere, dorrearen aurkako haserrea areagotu egin da, joan zen astean Dikarrek DVn argitaratutako azalpenen ostean. Bertan, Dikarrek zioen instalazio berria auzoko bizilagunen onerako egin dela, eta hori ez da horrela!
Auzotik Dikarri hainbat kokaleku proposatu dizkiogu dorre eta instalazio hori kokatzeko. Abiapuntua beti izan da orain arteko dorrea eta haren hainbat instalazio dauden tokitik beste leku batera mugitzea.
Zergatik? Haien hitzetan, orain arteko instalazioa oso zaharra delako; indarreko araudietatik kanpo ei dago, hondatuta, eta diotenez "kaltegarria da, eraikitzen ari garen berria baino askoz kaltegarriagoa".
Horretaz gain, esan ziguten Iberdrolaren irizpideez instalazioa Dikarreko mugen kontra egon behar izateak orain arteko instalazioaren kokapena baliogabetzen zuela.
Argi utzi dezagun Dikarreko zuzendaritzak ez dituela instalazioak berritu eta ordeztu bizilagunen mesederako, hedabideetan adierazi duen bezala, obligazioz baizik, legediak eta Iberdrolak behartuta.
Eta instalazio horiek mugitzerako orduan, auzoa gehien kaltetu dezaketen lekuan jarri dituzte.
Hortaz, Garagartza auzoko batzordetik berriro adierazi nahi dugu instalazio eta tentsio dorre berrien kokapenaren aurka gaudela, eta eskatzen dugu proposatu diren beste kokapenak aintzat hartu daitezela.
