Leintz Gatzagako herritarrak ez dira etxeetatik irteten, lehen mailako beharrak asetzeko ez bada, eta hori txalotzekoa da. Laguntza sarea ere martxan dugu herrian, eta norbaitek bere burua eskaini gura badu laguntza eskaintzeko, herritarren artean dugun Whatsapp taldearen bidez helarazten du mezua, baita alderantziz ere: norbaitek erosketak egin behar baditu edo farmaziara joan beharra badauka, honen berri ematen du eta zerbait behar duenak eskatzea besterik ez dauka.
Bestalde, beste herri askotan bezala, hemen ere egunero irteten gara, 20:00etan, leiho eta balkoietara, egoera honen aurrean lehen lerroan dauden mediku eta erizainak txalotzera, eta horretarako, txalo zaparradaz batera, danbor, trikiti eta tronpeta hotsak ere entzuten dira, herritarrak alaitu eta animatu nahian.
Datozen asteotara begira, bestalde, printzipioz ez da aldaketarik egongo, hasieratik hartu ditugun neurri berberak mantenduko ditugu, jendeak oso ondo hartu ditu eta aipatzekoa iruditzen zait Leintz Gatzaga dela Debagoienean koronabirusagatik kutsaturik ez dagoen herri bakarra izatea; beraz, jarrai dezagun horrela, denon artean lortuko dugu eta!
Herritarrei eskerrak ematea besterik ez zait gelditzen, zaindu zeuen burua eta zaindu ingurukoak! Animo eta besarkada handi bat denoi!