Erreka garbia eta biziagoa nahi dugulako

Erabiltzailearen aurpegia

Erreka biziberritzea amets eta auzolana tresna dugulako... Urriaren 15ean, zapatu goizez eta eguraldi zoragarria lagun, laugarren aldiz aritu ginen gure erreka bazterrak garbitzen. Hamar talde eta tramotan banatu ginen 200dik gora lagun. Mekolaldetik hasi eta Olaraino.

Goizean goiz elkartu ginen. Batzuk Labegaraietan eta gainontzekoak Seminarioko patioan. Taldeak egin eta lanean hasi ginen, batzuk kamioiekin, beste batzuk piraguekin, eta gehienok erreka bazterrean sartu eta eskuetan traste zahar eta zikinkeriak jasotzen. 

Leku askotan, aurreko urteetan egindako lana asko igartzen zen, eta goiza lasai joan zen. Zikinkeria ugari atera genuen, baina goiz-pasa ederra ere izan zen! 

Gogora ekarri nahi dugu urtero dioguna: dagoeneko erreka lagun mordo bat garela esan dezakegu, erreka biziberritzea amets dugu eta epe motz-ertainera ibai osasuntsu baten alde lanean jarraituko dugu. Alde batetik, gure esku dagoena eginez, eta, bestetik, erakunde publikoei zein herritar eta enpresei euren eginbeharrak bete ditzatela eskatuz. Garbitzen eta eragiten jarraitzeko bokazioa daukagu. 

Lerro hauekin, eskerrak eman nahi dizkiegu zapatuko ekimenean lagundu ziguten honako erakunde hauei: DYAri, Beti Busti elkarteari, Debagoieneko Mankomunitateari, Hierros Naparrari, Bergarako Udalari eta Oilagorra eta Pertxa elkarteei. 

Eta, nola ez, ekimenean zuzenean parte hartu zenuten lagun guztiei! Eskerrik asko! Eta datorren urtera arte!

----------

Eider Balzategi

Erreka Batzordearen izenean 

Bergara

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.