Debagoieneko EH Bilduk apirilaren 20an Iruñean ospatuko den Aberri Egunean parte hartzera animatzeko deia egin du.
Koalizio subiranistak nabarmendu duenez, "Apirilaren 20an ezkerreko milaka abertzale eta subiranista bilduko gara Iruñean Aberri Eguna ospatzeko eta libre bizi nahi duen nazio bat garela aldarrikatzeko”. Aurtengo Aberri Eguna “egoera politiko berezian ospatuko da, nazioarte mailako egoera nahaspilatsuak baldintzatuta. Gero eta gehiago direnean eskalada militarraz edo gerraz hitz egiten dutenak, Aberri Egunean Euskal Herria sustrai bakezale sakonak dituen nazioa dela”.
"Askatasunaren nazioa gara" lelopean, Euskal Herri osoko herritar subiranista, independentista, abertzale eta ezkertiarren komunitatea berriro bilduko da Aberri Eguna elkarrekin ospatzeko.
Egun osoko egitaraua Iruñeko kaleetan
Aberri Egun guztietan bezala, Golem zinemetatik eguerdiko 12:00etan abiatuko den manifestazio batekin hasiko da, eta ekitaldi politiko batekin amaitu. Aldarrikapen martxaren ondoren, aisialdirako unea iritsiko da, adin guztientzako eskaintzarekin.
13:15etatik aurrera, eta Basotxotik abiatuta, trikitilari, gaitari eta erraldoiekin, Kuxkutu txarangarekin eta munduko dantzekin kaleko animazioa izango da, hiriko kalerik giroenetara joango dira manifestazioko partaideekin batera. Era berean, Malatxo txaranga Jarauta kalera zuzenduko da gazteei gazte gunera laguntzeko.
Gazteluko plaza izango da jaiaren epizentroa Aberri Egun honetan. Arratsaldeko 16:00etatik aurrera, izen handiko euskal taldeen kontzertuak izango dira bertan: Izaki Gardenak, Belako eta Trikidantz.
Etxeko txikienek, bestalde, Burgoen plazan izango dute beren gunea, haurrentzako jolasak eta ‘Ai, Zapotxin! Baratxuri zoparen sekretua’ kale antzerkiarekin.
Autobusak Debagoienetik
Hitzordu garrantzitsu honetara joateko autobusak antolatu dituzte herriz herri. Joan-etorria 10€koa izango da, eta aurrez izena eman beharko da. Hona hemen herriz herriko izen-emate guneak:
Antzuola
Aitz Garbi taberna
Aretxabaleta
Urbaltz taberna
Arrasate
Irati eta Taupa tabernetan
Bergara
Arrano eta Pol Pol taberna
Eskoriatza
Inkernu taberna
Oñati
Arrano taberna
