Ostalari herrikide agurgarriok,
Dakizuen bezala, azaroaren 27an Goienako komunitatean argitaratu zenuten gutunak islatzen zuen ezinegona ikusirik eta bertan esaten zenutena argitze aldera, zuekin bilera bat lotzen saiatu gara, baina ez da momentu honetan posible izan. Beraz, idatziz zuzentzen gara zuengana, batetik, bileran adierazi nahi genizkizuenak zuei helarazteko eta, bestetik, gurekin biltzeko momentua dela erabakitzen duzuenerako gure disposizio osoa azaltzeko.
Esan bezala, Goienan argitaratutako idatzian zuen ezinegona adierazten zenuten, udal gobernuari zuen sektoreari laguntzeko proposamenak aurkeztu ondoren, egin genuen komunikazioarengatik. Lehenik eta behin, beraz, barkamena eskatu nahi dizuegu ezinegon hori sortzeagatik. Zuen idatzia irakurrita ikusten dugu ez garela gai izan zuen alboan gaudela azaltzeko. Gure gizartean garrantzia eta presentzia handia duen sektore bat zarete eta EAJko udal ordezkariok, gainerako herritarrek bezalaxe, baditugu ezagunak, lagunak edota senitartekoak sektorean eta horiei gure elkartasuna eta laguntza ematen saiatu gara, baina bistan denez, sektore bezala ez duzue gure elkartasun hori sentitu. Oñatiko kasuan, ostalaritza ez dago elkarte baten bidez antolatuta eta ez da erraza ordezkaritza definiturik gabeko sektore batekin harremanak egitea baina, zailtasunak zailtasun, onartzen dugu harreman falta honetan gure ardura.
Hala ere, ez gara egon beste alde batera begira eta udal ordezkari garen heinean saiatu gara zuen beharrei erantzuten, gainerako sektore kaltetuei bezalaxe. Horretarako egia da ez dizuegula zuzenean zuei galdetu, baina gure hausnarketa egin dugu, han eta hemen egin diren hainbat proposamen aztertu ditugu eta saiatu gara beti udaletik eman daitekeen erantzunik egokiena emateko lan egiten. Lehen olatuan sortu genuen krisi mahaian hainbat neurri adostu genituen eta neurriak proposatu ditugu ordenantza fiskaletarako eta baita datorren urteko aurrekontura begira ere. Alkatearekin azaroaren 17an egin genuen bilerara eraman genituen proposamenak hainbat lekutan hartu diren eta Oñatirako egokiak izan zitezkeela pentsatzen genuen neurriak ziren.
Egia da udalak zuekin antolatutako bileran gure taldeko kide bat izan zela eta egia da baita ere herritar modura joan zela, izan ere, gobernuak ez gintuen udal talde modura gonbidatu. Ahal dugun leku guztietan egoten saiatzen gara eta gonbidapenik jaso ez bagenuen ere, bilera irekia zenez bertan egoteko aukera aprobetxatu genuen, baina udal talde bezala gonbidapenik jaso ezean, ez gara horrela aurkezten. Litekeena da bilera hartan egindako eskaera batzuk gure proposamenekin bat etortzea, beharrak eta proposamenak antzekoak direlako Oñatin eta Euskal Herriko gainerako lekuetan ere, baina argitu nahi dizuegu zuen idatzian aditzera ematen duzuena ez dela zuzena. Ez gara zuen beharrak politikoki erabiltzeko asmoz bilera horretara joan. Ez ditugu zuen eskaerak gureak balira bezala aurkeztu. Gai honetan, gainerakoetan bezala, gure aletxoa jartzen saiatu gara eta beti egin ohi dugun moduan, egin ditugun proposamenen berri ematen saiatu gara. Zilegitasun osoz egin ditugu publiko gure proposamenak, udal gobernuak bere lana publiko egiten duen bezalaxe.
Edozein kasutan, alkatearekin izan genuen bilera hark emandako emaitzekin gustura gaude, gure eskaera batzuk onartu zituelako udal gobernuak eta horri esker uste dugulako dirulaguntza lerroa hobetu ahal izan dugula. Hala ez bada, gure ateak zabalik dituzue eta gustura entzungo dizuegu. Gure eskuetan dagoena egiteko hemen gaude eta gugana jo dezakezue nahi duzuenean.
Amaitzeko, Arkupe tabernari egiten zenioten erreferentziaren inguruan, gainerakoan gure akatsak onartu eta barkamena eskatu dizuegun modu berean esan behar dizuegu aipamen hori ez zaigula bidezkoa iruditu. Egia da bi aldeen artean desadostasun nabarmenak daudela, pandemiaren aurrekoak. Alde bakoitzak izango du bere ikuspuntua eta ziurrenik ez batzuk eta ez besteok ez dugu %100ean arrazoirik izango. Ez zaigu bidezkoa iruditzen, beraz, oro har Oñatiko ostalarien eta EAJ udal taldearen artean sortu den gaizki ulertu honetan zer ikusirik ez duen beste arazo bat nahastea. Alde bakarrari entzunda gainera eta gure iritziz zuzenak ez diren afirmazio batzuekin.
Hein batean eta zuekin biltzeko aukera izan arte gure arteko gaizki ulertua argituta gelditu delakoan eta zuek nahi duzuenean zuekin biltzeko disposizio osoa azalduz, jaso itzazue gure agurra eta gure elkartasun eta animoak, bizi duzuen egoera zailari aurre egiteko.
Adeitasunez,
Oñatiko EAJ udal taldea