Oñatiko herriak 379.000€ eskuratu berri ditu Madrilgo KUPOaren negoziaketa prozesua dela-eta oñatiarron alde. EH Bilduk, EAJ-PNVren negoziaketa gogor kritikatu badu ere, behin dirua eskuratuta, ordea, ez du inolako zalantzarik izan diru hori erabiltzeko. Izan ere, jasotako kopurutik 240.000€ erabili ditu udal gobernuak Euskal Herriko Justizia Auzitegi Nagusiak ezarritako kalte-ordaina ordaintzeko. Kalte-ordain hori EH Bilduk hartutako erabakiaren ondorio zuzena da; hain zuzen, 2016.urtean udal gobernuak erabaki baitzuen ordu arteko kale-garbiketa kontratua etetea. Erabaki horren ondorioz, 4 lagun langabezian gelditu ziren eta horiek ezarritako errekurtsoari erantzuna izan da 240.000€tako kalte- ordainaren ordainketa.
Oñatiko EAJ-PNVren udal taldea langileei eragin dizkien kalteen konponbidearekin ados agertu da, ez ordea, EH Bilduren udal gobernuak hartutako erabakiarekin . Ildo horretan, gobernuak oñatiarrontzat jasotako dirua euren kudeaketa txarra ezkutatzeko erabili duela salatu genuen azken osoko bilkuran. Gainera, dirua erabiltzeko erabakia Alkate Dekretu bitartez eraman da aurrera, EAJ-PNVri beste proposamenik aurkezteko aukera ere eman gabe.
Guzti hori kontuan izanik, EH Bilduren gobernuaren kudeaketa txarra kritikatzen dugu beste behin. 379.000€ak oñatiarron mesedetan erabili behar dira eta ez, inondik inora, udal gobernuaren kudeaketa txarra ezkutatzeko. EAJ-PNVren iritziz diru hori udal zerga eta tasak jaisteko erabiliko beharko litzateke, horrela Oñatiko familia bakoitzak gutxi gora behera 85€ko hobaria jaso ahal izango bailuke.
