Bergarako EAJ-PNVren udal taldeak EH Bilduren Udal Gobernuari eskatu dio herritarrei kontsulta bat egitea susta dezala, merkataritza-lokalak etxebizitza bihurtzeko aukerari buruz bergararrek duten iritzia ezagutzeko. Etxebizitza bat eskuratzeko gero eta zailtasun handiagoak daudela ikusita, jeltzaleek beharrezkotzat jotzen dute aukera berriak aztertzea eta Udalak eskura dituen tresnak baliatzea benetako irtenbideak eskaintzeko.
EAJ-PNVk gogorarazi duenez, etxebizitzaren arazoari aurre egiteko erakunde desberdinen inplikazioa beharrezkoa bada ere, udalek ere badituzte eskumenak eta epe labur, ertain eta luzera jarduteko gaitasuna. Horien artean, udal ordenantzak aldatzeko aukera nabarmendu dute, hirigintza-erabilera jakin batzuk malgutzeko eta beharrezko baldintzak betetzen dituzten merkataritza-lokalak etxebizitza gisa erabiltzea ahalbidetzeko.
Ildo horretan, Kepa Sebal Lazpiur udal talde jeltzaleko bozeramaileak hitzetatik ekintzetara igarotzeko beharra azpimarratu du: “Etxebizitza herritarren kezka nagusietako bat da, eta Bergara ezin da besoak gurutzatuta geratu. Udalak baditu jarduteko tresnak, eta EH Bilduk bere erantzukizuna bere gain hartu behar du. Kontua ez da irtenbide bakar bat bilatzea, baizik eta gure herrian etxebizitza-eskaintza handitzeko aukera guztiak baliatzea”.
Donostia eta Arrasate, Bergararentzako bi eredu
Jeltzaleek Donostiako adibidea jarri dute mahai gainean. Bertan, merkataritza-lokalak etxebizitza bihurtzea ahalbidetzeko araudia malgutzeak 160 etxebizitza berri baino gehiago egokitzea ahalbidetu du. EAJ-PNVren iritziz, esperientzia horrek erakusten du udal mailan hartutako erabakiek etxebizitza-beharrei erantzuten lagun dezaketela.
Era berean, gogorarazi dute Arrasaten gai berari buruzko kontsulta-prozesu bat jarri berri dutela martxan, eta Bergarak ere antzeko ekimen bat bultzatu beharko lukeela uste dute.
“Donostian neurri honi esker 160 etxebizitza baino gehiago sortu badira, eta Arrasaten dagoeneko herritarrei galdetzen ari bazaizkie, zergatik ezin dugu gauza bera egin Bergaran? Udal Gobernuak egin beharko lukeen gutxienekoa eztabaida irekitzea, bergararrak entzutea eta aukera hau serio aztertzea da”, adierazi du Sebalek.
EAJ-PNVk azpimarratu du edozein araudi-aldaketa irizpide tekniko eta urbanistiko egokiekin egin beharko litzatekeela, bizigarritasun-baldintzak bermatuz eta merkataritza-jarduera mantentzea lehentasunezkoa den eremuetan jarduera hori babesteko beharra kontuan hartuz.
Herritarrak entzun eta erabakiak hartu
Talde jeltzalearen ustez, merkataritza-lokalak etxebizitza bihurtzeko aukerak ez du beste etxebizitza-politika batzuk ordezkatu nahi, hala nola babes ofizialeko etxebizitzen sustapena edo hutsik dauden etxebizitzak merkaturatzea. Aitzitik, udal estrategia anbiziotsuago baten barruan beste aukera bat gehitzea da helburua, etxebizitzaren arazoari hainbat arlotatik erantzuteko.
Horregatik, funtsezkotzat jotzen dute Udal Gobernuak parte-hartze prozesu bat abian jartzea, herritarren iritzia ezagutzeko eta neurri honek Bergaran eskain ditzakeen aukerak baloratzeko.
“Ezin dugu onartu irtenbideak aztertu ere egin gabe baztertzea. Etxebizitzaren krisiak ekimena, borondate politikoa eta erabaki zehatzak eskatzen ditu. EAJ-PNVtik proposamen eraikitzaile bat egiten dugu, eta EH Bilduri herritarrak entzun eta jarduteko eskatzen diogu. Bergarak erantzunak behar ditu, ez geldialdia”, amaitu du Sebalek.