Animalien babeserako lege berria

Entzun ditugu lege horrek animaliei ekarriko dizkien abantaila izugarriak, baina egia da? Bitxia bada ere, animalien babeserako elkarteen %90 aldaketaren aurka daude. Zergatik? Ezin da ukatu legeak hobekuntza handiak ekarriko dituela. Hainbat neurri harritzekoak dira: zero sakrifizioa, animaliak lotuta edukitzeko edo erakusleihoetan erakusteko debekua, katu kolonien CES bidezko kontrola... Animaliak dituzten zirkuak ere debekatuta daude! Baina legea arretaz irakurriz gero, indarrean dagoen legedian sartzen ez den bazterketa bat aurkituko dugu: "Ekoizpen- edo errenta-animaliak kanpoan geratzen dira". Hau da, lege berria argitaratzen den egunera arte Euskadiko aziendak bere ongizatea babesten duen legedia du. Hori bertan behera gelditzen da lege berria argitaratu bezain laster. Behiak, ardiak, ahuntzak eta zaldi gehienak babes eremu horretatik kanpo geratuko dira. Nola liteke animalien babeserako lege baten eguneratzeak animalien zati handi bat baztertzea?