Bederatzigarrena ez da gauza euskara txukun erabiltzeko, baina badu nolabaiteko maila zerbait ulertu eta esateko. Hamargarrenak, berriz, ez du harremanik euskararekin.
Euskararen ezagutzaren datua herrian sekula egon den altuena da. Erabilerarekin, ordea, ez da gauza bera gertatzen: hamar antzuolarretik seik baino ez dugu egunerokotasunean eta beti euskara erabiltzen. Azken aurreko neurketan, zazpi ginen; hortaz, atzerantz goaz.
Euskararen erabileraren neurketak emandako datuak dira aipatutakoak. Niretako ez da sorpresa izan; kalekume izanik, susmatzen nuen. Terrazetan, dendetan, kirolean, eskola aurrean… gaztelania ari da nagusitzen. "Gure kuadrillan X ibiltzen da, eta haura ez baztertziagatik, ba, erderaz egiten dogu". Jarrera hori ulertzen dut, baina poliki-poliki hilobira garamatza; ez dakienari ere egin behar zaio euskaraz, beharra senti dezan. Bihotzean labankada ematen diguna, berriz, hiru/lau/bost euskaldun elkartu eta erdaraz jarduten dutenen jarrera. Horiek euskara erailtzen ari dira.
