Aurten Korrikak ez du Antzuola zeharkatuko. Pena –eta amorru puntua ere bai, egia esan behar bada!–. Duela hiru urte ere ez zen hemendik pasa, baina orduan, Aiherrako senideekin batera ospatzeko baliatu genuen egoera. Euskarak elkartzen gaitu, eta, horregatik, Aiherrara joan eta elkarrekin eraman genuen euskararen lekukoa.
Korrikak ez, baina geure oinek elkartuko gaituzte berriro Aiherra eta Antzuola, Antzuola eta Aiherra. Izan ere, herri bien arteko harremana sendotuko duen ekimen baten lehen pausoak ematen hasi gara: oinezko ibilbidea 11 etapatan banatuta. Ibilbide birtual osoa eginda dago, eta hasita gaude birtuala den hori, mapetan agertu zaiguna, errealitatean ere badagoela egiaztatzen: bidezidorrak, iturriak, ostatuak… Informazio hori guztia webgune berri batean txertatuko dugu, gida moduan erabilia izan dadin. Ibilbideko udalerrietako ohiturek, zerbitzuek, kulturek, paisaiek… osatuko dute senidetzearen ibilbidea.
Euskararekin, berriro ere, mugak zubi bihurtuko ditugu.
