Uztailaren 5ean bukatuko da hamazazpigarren edizioa eta urrian bueltatuko dira. Baina, Goenkale-ren jarraitzaileak pozik egon daitezke. Uda honetan, Goenkalez blai telebista saioa ikusi ahal izango dugu eta. Maria Cruickshank aktore oñatiarrak aurkeztuko du saioa eta Goenkale telesailaren ibilbide luzea laburbilduko dute bertan.
1994.urtean hasi zen telesaila, beraz, oroitzapenak eta anekdotak ugariak dira. Telesailaren edizioak banan-banan aztertuko dituzte eta, bitartean, garaiz garai munduan eta Euskal Herrian gertatzen ari zena ere kontatuko digute.
Interesgarria izango da aspaldian ikusi ez ditugun aktoreak ikustea eta euren iritzia ezagutzea. Baina, interesgarriagoa izango da urtez urte Goenkale-ren laburpena egiten duten heinean, munduan eta, batez ere, Euskal Herrian garai berean zer gertatzen ari zen ezagutzea. Maria Luisaren heriotza ikusten ari ginen bitartean zer gertatzen ari zen munduan? Zenbat aldatu da Goenkale lehen ediziotik? Eta mundua?