Ezkontzea zein haurrak adoptatzea legez onartu zaigu. Trans pertsonek NANko generoa alda dezakete. Zer gehiago nahi dugu? Hiritar funtzionalak izan gaitezke nortasun agiri, senar-emazte eta seme-alabekin. Ireki zaigu "normalak" izateko aukera. Heteroarauak ordea jarraitzen du gorputzak, identitateak eta desirak diziplinatzen.
Norbere azaletik ez bada, zaila da zapalkuntzez jabetzea. Azalari utziko bagenio esango liguke tatuaturik duela eskolan jasotako "marikoi" bakoitza. Orbainetan irakurriko genituzke kaleetan bizitako beldurrak, jasotako kolpeak. Azal azpitik entzungo genituzke isildutako desirak eta ukatutako plazerak. Hitz egingo lukete lantokian, familian, komunikabideetan edo osasun sisteman jazarriak diren gorputz eta identitateek. Eta sentituko genuke gureak ere badirela; igandean Argentinan hil zituzten lesbianen azal erreak bezala, Israelen "gayfriendly" bonbek erretzen dituzten palestinarren azalak bezala.
