Musean lau erregeak tokatuta ere, ez dut hordagorik botatzen handira… Batzuek horrenbeste miresten duten konstituzioaren enegarren artikuluak ez du esaten, bada, denok berdinak garela? Non apuntatu behar da errege izateko? Erregeak nahi ditugula? Derecho de pernada berrezarriko nuke nik, Erdi Arora buelta: etorri vascongadetara, Felipe, eta ezagutu bertako neskak… Eta mutilak.
Hau esanda, nola da posible gure bihotzeko futbol taldearen izena Real Sociedad izatea? Ze izen klase da hori? Eta gaztelaniaz, gainera? Oraintxe aldatuko nuke nik: Ñoñostiarrak edo Giputxasko, adibidez. Eta Athletic? Bizkaitarrak ez dira brexit-arekin enteratu, ala? Atzetik edo Gabarrabarik izan daitezke izen egokiagoak. Gasteizko taldearen izena euskaratu egingo nuke: Alaves=Batera. Eibarren izena ere alda dezakegu; kalean dagoen giroa ikusita, Hey Bar izan daiteke. Euskarak arazo gehien duen probintzian, ezin da hitz politagorik aukeratu: Osasuna… Ole nafarrentzat. Nondik hasi naizen gogoeta hauekin? A, bai… osasun ona opa dizuet denoi, monarkiari izan ezik: Altza Felipe, tru la lai!
