Amak askotan gogorarazten dit, nire gelara etortzen zenekoa, korrika eta arduratuta barre algarak entzutean. Rompetechos-en komikiak irakurtzen ari nintzela ikustean, lasai bueltatzen zen ohera, zoratuta nengoen galdezka…
Francisco Ibañez da umetan irakurtzen nituen komiki gehienen sortzailea: Sacarino, Pepe Gotera, Rompetechos, Mortadelo eta Filemon… Argi daukat umorea ulertzeko moduan eta nire jakin-mina garatzen eragin handia izan zuela, gaztelaniazko hiztegia aberasteaz gain. Oraindik idazten jarraitzen du eta nik berarekin barre egiten.
Sentsazio horiek nire alabei transmititzen ahalegintzen naiz eta gau batzuetan beraiekin etzaten naiz Rompetechos eta Mortadelo eta Filemon irakurtzeko. Uste dut beraiek ere pixka bat zoratuta nagoela pentsatzen dutela…
Eskerrik asko, Ibañez… eta eskerrik asko oparia egin zidanari.
Badaude beste batzuk nire hezkuntzan asko lagundu zutenak ere: Marx anaiak, Clint Eastwood, Tintin, Asterix, Bud Spencer eta Terence Hill... baina horiek beste baterako utziko ditut.
