Gari soro beteko garaian joan dira mendizale antzuolarrak Araban dagoen Badaia izeneko mendizerra zeharkatzera. Hango gainetatik ezagunak eta ez hain ezagunak diren inguruak antzeman dituzte: Arkamu mendizerra, Gorbeia eta Marinda gainak, Oro santutegia, Murgia, Zuhatzu-Kuartango, Urkabustaiz (Izarra): "Antzuolatik gertu daude, baina asko ezezagunak egiten zaizkigu", aipatu dute.
Goros izeneko kobetan murgiltzeko aukera ere ez dute alferrik galdu, lurraldeko gune xarmantetako bat izanik. Bi kilometro baino luzeagoko galeriak eta 50 metroko desnibela dauka kobazulo-sareak; hala, sarrerako pasabideak arakatzera ausartu dira, arriskuak hartu gabe. Bukaeran, ohi bezala, tragotxo bat hartu eta ibilbidearen bueltako tertulia egin dute.