Hainbat erakundek (mendi federazioak, ehun mendietako anaideen elkarteak, Euskaltzaindiak...) ofizialki onartu dutenez aldaketa hau, Aitzuri gaineko buzoiaren plaka zaharberritzeko zegoenez, Arrolak Aketegi bezala izendatu du garai bateko Aitzuri gaina. Esan ere, orain arte Aitzabal gaina zenari, Aitxuri izena jarri diotela ofizialki.
Helburu horrekin jo dugu Aizgorrira, eta azken elurteek lagatako elurrak zapalduz igo gara gainera. Igoeran, ugatza ikusteko aukera ere izan dugu. Badirudi gure mendi gainetan gero eta ugariagoa dela hegazti mota hau. Behin gainean, plaka berria jarri diogu buzoiari, eta bide batez konturatu gara berandu izan baino lehenago, konponketa batzuk ere behar dituela. 2022an, Arrolak bere 50. urteurrena ospatzen duela, momentu egokia izan daiteke konponketa horiek egiteko.
