Ikasturteari amaiera borobila emateko, ekintzaz betetako egitaraua prestatu du Ikastolak egun handirako; aurtengo nobedade nagusia Porrotxinen bisita izango da.
Goizeko ekintzak, 9:30etik aurrera
Goizean goiz, LH 4 eta DBH 1-2ko ikasleak 9:30etan bilduko dira Biteri plazan ginkana handi bat burutzeko. Ondoren, 10:30etan, Olarte guneko haurren txanda izango da: danborrada hotsak zabalduko dituzte herrian zehar, Olartetik hasi, Seberotik igaro eta Herriko plazaraino ibilbidea eginez.
Arratsaldeko jolasak eta kalejira nagusia
Eguerdi partean, 14:30etik aurrera, Biteri ingurua gaztez beteko da Arimazubi, Gazteluondo eta Santa Teresako ikasleen jolas eta lehiaketekin. Jarraian, 16:30ean, Santa Teresa, Olarte, Umezaintza eta Uribarriko familia, ikasle eta irakasleak kalejira koloretsuan hurbilduko dira Biteri plazaraino, komunitate osoa jaian batuz.
Ikuskizunak eta Porrotxinen bisita, 17:00etatik aurrera
Arratsaldeko festaren irekiera 17:00etan egingo dute txalaparta eta bertsolariekin. Ordu berean jarriko dira martxan tailerrak (henna, haur txokoa...), puzgarriak eta txosna. Ondoren, ekintzek jarraituko dute:
- ● 17:15ean: Argitxori ongietorria.
- ● 17:30ean: Streetdance ikuskizuna.
- ● 17:45ean: GURAkoen ikuskizuna.
- ● 18:00etan: Une berezienetako bat izango da, Porrotxinen bisitarekin txikienak irribarrez betetzeko.
- ● 18:30ean: Gaztelupe eta Gazteluondoko dantzarien euskal dantza saioa izango da.
Jaiaren amaiera, musika eta DJ saioarekin
Egunari amaiera ezin hobea emateko, 19:00etatik aurrera DJ Goikok girotuko du Biteri plaza, ikasturteari agur esateko modu hoberenean bertaratutako guztiak dantzara deituz.
Puzgarriak, tailerrak, txosnak eta denda
Arratsalde osoan zehar, txosnetan ez dira taloak eta edariak faltako. Horrez gain, Ikastolako kamiseta eta jertse berriak zein Kilometroak 26eko arropa erosteko aukera egongo da.
Aurkezle lanetan eta oholtzatik giroa alaitzen Aitor Guridi arituko da, Zaldibar guneko arduraduna.
