Festa giroa nagusitu zen atzo arratsaldean Basabeazpi gunearen bueltan Argitxo Sariak jasotzeko. Argitxo bera etorri zen horiek banatzera eta umeek opariak jaso zituzten egindako lanaren truke.
Herriko txokoak, parajeak, kontuak, istorioak eta ohiturak ezagutzeko helburuarekin auzorik auzo joateko asmoa dute Basabeazpiko kideek. Aurten, hirutara iritsi dira: Oro, Galartza eta Goroetara hain zuzen, eta makina bat istorio ezagutu dituzte. Bisitan joandakoan marrazkiak utzi zituzten Argitxorendako; baita topatu ere hark. Hortaz, pozik eta opariz beteta azaldu zen umeen aurrean.
Gonbidatu berezi bat ere agertu zitzaien azken orduan: Otsobenito. Kontu xelebreak kontatuz eta jolaserako eta dantzarako gogoz etorri zen, eta guztiek elkarrekin eman zioten festari amaiera.
