Testuinguru oso berezian izan da gertakaria; Donostia 2016 bertan, Tabakaleraren irekiera, Zinemaldia… eta horrek Donostian bertan kultura eredu ezberdinen arteko eztabaida piztu du, kapitalaren eta herriaren kultura parez pare jarriz.
Espazio autogestionatu edota okupatuen erabilera aldatzen doan sentsazioa daukat aspaldi. Gaztetxeak izan dira orain arte eremu horretan erreferente, eta gazteak izan dira, gazte izateagatik, helduen tamainara egindako mundu honetan antolatu eta gazte problematika landu dutenak, gazteon eredua eta helduena parez pare jarri dutenak.
Gaur egun, aldiz, espazio askotan gazteak ere bildu eta antolatu arren, bestelako arlo batzuk garatzen dira; hor ditugu, gaztetxeetan izaten diren adibideez gain, Astra, Eraldia eta Bilboko okupazio feminista, adibide gisa. Eta horrek galderak sorrarazten dizkit.
Gazte izatearen kontzientzia galtzen ari al gara? Gazte izatearekin baino gehiago, beste kolektibo batzuekin identifikatzen al gara? Belaunaldi berriek nola bizi dute gazte izatea? Gazte belaunaldien artean etenik ba al dago? Zein iritzi dute gazteek?