Gure militantzia, gure herritik 400 kilometrora epaitzea nahi, eta horretarako, inongo graziarik egiten ez duen zirkua martxan dago; tximino bipolarra, soldata irabazteko froga esanguratsuenekin txostenak osatu nahian dabilen malabarista, mozorrotuta desfilean agertu diren pailazo sarkastikoak... paper guztiak banatuta!
Ez da erraza, ez, holako zirku baten parte hartzea. Duela lau urte bizitakoak gogoratzea, bizitza tximino, malabarista eta pailazoen eskuetan dantzan ikustea... zenbat barre eta negar, malko eta besarkada. Eta azkenean, emankizunaren amaieran zozketatuko den sarirako txartelez beteta dauzkat patrikak.
Patrikak txartelez, baina gorputza zirraraz daukat beteta. Jasotako babes, konpromiso eta elkartasunak sortutako zirraraz, maitasunez eta berotasunez.
Eskerrik asko zuen babesa erakutsi, eta libreago izateko bidean konprometitu zareten denoi. Zirkuan ikusle papera eman nahi izan dizuete herritarrei, baina abenduaren 13an protagonista izango gara berriz. Herritik 400 kilometrora epaitu nahi izan arren, Bergarak sententzia emana daukalako, epaitegia inguratzera goaz! Eman eskua!
