Narratiban adituek esan ohi dute historian kontatu diren istorio gehienek dutela atzean sexuaren edo heriotzaren elementua, era inplizituan bada ere. Horrek dakarren erakargarritasuna ezin alde batera utzi telebistako ordu erdiko ekoizpenean, eta, egitate horiek nolabait justifikatzeko, askotariko telesailak eraiki izan dira.
Ikusi dugun azkenengo lana izan da Telecincok estreinatu duen Angel o Demonio telesaila. Heriotzari espiritualtasunaren osagaia gehitu diote, zentzu bako hilketa, bortxaketa eta suizidioak zuritzeko.
Errealitatea gainditzen duten indarkeria ulergaitzak ikusi ditugu, beraz, Angel o Demonio telesailaren lehen kapituluan; haatik, tipiko eta topikoetatik atera ezinik dauden pertsonaiek egiten dute telesaila are jasanezinagoa: gizonezko aingerua eta emakumezko deabrua, gizon bortxatzailea eta emazte bortxatua, Skin Heads oldartuak eta neska nerabe beldurti eta otzana.
Hara! Ikuslearen antsietatea elikatzen jarraitzeko bonba hemen.
