Hainbat adituk gaur egungo testuinguru aldakorra marraztu ziguten; horien artean, telebista-enpresetako ordezkariek beren estrategia berriez hitz egin zuten. Mezua argia zen: "Ikus-entzunezko produktuak dibertsifikatu behar ditugu pantaila eta erabilera berrietara, audientzia jada ez dago-eta etxeko sofan jarrita guri begira".
Bideo, software, aplikazio eta izen modernoen artean Kantar Mediakoak (lehen Sofres zena) egon ziren, ikus-entzunezko kontsumoa nola neurtzen duten azaltzeko. Jaso nuen informazioak ez zuen ezer berririk: "Audimetro gutxi batzuek zapping egiten dagoen audientziaren informazioa batzen dute, besterik ez".
Audientzia ikerkuntza ez da aldatu 80ko hamarkadatik, eta, gezurra badirudi ere, egun ere telebista saioen arrakasta eta porrota (milaka euroz ari gara) audientzia emaitza horiei lotuta dago. Kantarren mezua ere argia zen: "Ez dago gure emaitzak zalantzan jarriko dituen konpetentziarik".
Horra hor bi errealitate kontrajarri, bata bestearen menpe bizi direnak.
