Egin dezagun, bada, azken bi asteotako errepasoa.
Hasteko, martxoaren 17ko greba orokorra ekarri nahiko nuke, ez bakarrik nire azaletik ikusten dudalako 1.500 eurotik beherako diru-sarrerarekin, bestelako sostengu ekonomikorik izan ezean, ezin dela egungo bizi-kostua duintasunez asumitu, baizik eta hemengo gutxieneko soldata hemen erabaki behar dela eta biztanle guztiok bizitza duina izateko eskubidea dugula aldarrikatu nahi dudalako.
Bestalde, aste berberean hasi da 24. Korrika. Behin baino gehiagotan idatzi dut ekimen berezi honi buruz; beraz, gaur ez dut baloraziorik egingo. Hala ere, tarte hau aprobetxatu nahiko nuke bertan parte hartzera gonbidatzeko, gaur gauetik bihar goizera bitartean izango baitugu Korrika gurean, Debagoienean! Ez ahaztu, Euskara gara!
Aste mugituak izan ditugu, beraz, gurean. Eutsi diezaiogun horri!